АНУ-ын арми Персийн булангийн орнуудад 1.5 тэрбум баррель нефть экспортлоход тусалсан гэв

Иран Хормузын хоолойг хяналтдаа авах гэж оролдож байгаа ч АНУ-ын цэргийн хүчин 6-р сараас хойш Персийн булангийн орнуудад 1.5 тэрбум гаруй баррель нефть экспортлоход тусалсан гэж АНУ-ын Төв командлал мэдэгдсэнийг Al Jazeera мэдээлэв. Командлалын мэдээлснээр сүүлийн зургаан сард 3,000 гаруй худалдааны хөлөг онгоц тэдний дэмжлэгтэйгээр хоолойг нэвтэрсэн бөгөөд сүүлийн саруудад хөлөг онгоцны 95 гаруй хувь нь аюулгүй өнгөрчээ.

Төв командлалын командлагч адмирал Брэд Купер бүс нутагт айлчилж, хоолойн нөхцөл байдлыг нисдэг тэргээр ажигласан бөгөөд мина цэвэрлэх ажиллагааны ачаар хөлөг онгоцны гол замууд Ираны минагүй болсон гэв. Тэрээр “Бид Персийн булангийн түншүүд болон тээврийн салбартай мөр зэрэгцэн зогссоор байна” гэжээ.

АНУ, Израиль 2-р сарын сүүлээр Ираны эсрэг дайн эхлүүлэхээс өмнөх түвшинд нефтийн урсгал ихээхэн сэргэжээ. Kpler судалгааны компанийн мэдээллээр 9-р сард Иранаас бусад бүс нутгаас өдөрт дор хаяж 16.5 сая баррель нефть гарсан нь дайны өмнөх дундажтай тэнцэж байна. Шинжээчид энэ сэргэлтийг далай дээр хөлөг хооронд ачаа шилжүүлэх, АНУ-ын цэргийн дагалдан хамгаалалт, нефтийн хоолойн ашиглалт нэмэгдсэнтэй холбож байна.

Гэсэн хэдий ч нефтийн үнэ дайны өмнөхөөс хамаагүй өндөр хэвээр байна. Brent маркийн нефтийн фьючерс Ням гарагт баррель нь 114.50 ам.доллар орчим байсан нь өнгөрсөн долоо хоногийн зургаан сарын дээд түвшнээс 2 орчим хувиар буурсан үзүүлэлт юм. Харьцуулбал, АНУ, Израиль Иран руу цохилт эхлүүлэхийн өмнөх өдөр буюу 2-р сарын 27-нд Brent 72.48 ам.доллар байжээ.