Их Британи энэ өвөл Европт хамгийн өндөр эрчим хүчний зардалтай орнуудын нэг болох төлөвтэй

The Guardian сонины мэдээлснээр, Их Британи энэ өвөл импортоос улам хамааралтай болж, Европт хамгийн өндөр эрчим хүчний зардал төлөгч орнуудын нэг болох төлөвтэй байна. Эрчим хүчний системийн операторуудын өвлийн албан ёсны таамгаар хамгийн хүйтэн саруудад хий, цахилгааны эрэлтийг хангах хэмжээний нийлүүлэлт байх бөгөөд үүний нэг шалтгаан нь импортоо баталгаажуулахын тулд хөрш зах зээлүүдээс өндөр үнэ төлж байгаа явдал аж.

Эдгээр таамаг Европын хийн зах зээлийн жишиг үнэ ОХУ Украин руу бүрэн хэмжээний түрэмгийлэл эхлүүлснээр үнэ огцом өссөн 2022 оны арванхоёрдугаар сараас хойших хамгийн өндөр түвшинд хүрснээс хэд хоногийн дараа нийтлэгджээ. Хийн сүлжээг ажиллуулдаг National Gas компани Бельгийн томоохон хоолойн эзэмшигчтэй сүүлчийн мөчид тохиролцож, хүчин чадал бууруулах төлөвлөгөөг цуцлуулснаар энэ өвөл хий тасралтгүй орж ирэх боломжтой болсон. Эрчим хүчний зохицуулагч Ofgem баталсан уг хэлэлцээр хийн дундаж төлбөрийг сард ойролцоогоор 10 пенсээр нэмнэ. Ингээгүй бол хамгийн муу хувилбарт хий дуусах эрсдэл байв.

National Gas-ын таамгаар Их Британи далайгаар тээвэрлэх шингэрүүлсэн байгалийн хийн (LNG) импортоо өнгөрсөн өвлөөс ойролцоогоор 5 хувиар нэмэх бөгөөд Ойрхи Дорнодын хямрал Персийн булангийн нийлүүлэлтийг ноцтой тасалдуулснаас хойш зах зээлийн үнэ гурав дахин өссөн байна. Европ даяар хийн нөөц бага байгаа тул Британийн худалдан авагчид LNG-ийн ачааны төлөө Европын орнуудтай ширүүн өрсөлдөх шаардлагатай болбол үнэ өндөр хэвээр байж болзошгүй гэж компанийн тайланд дурджээ.

Катараас гаргах хийн экспорт удааширч, уур амьсгалын хямралын улмаас дээд амжилтын халалтын үед хөргөлтөд хий их зарцуулсан тул Европ наймдугаар сарын эцэст сүүлийн 13 жилийн хамгийн бага хийн нөөцтэйгөөр хүйтний улиралд орох төлөвтэй байв. Хойд тэнгисийн дотоодын олборлолтод олон арван жил түшиглэсэн Их Британи Европт хамгийн жижиг хийн агуулахтай орнуудын нэг бөгөөд энэ жил олборлолт 6 хувиар буурах төлөвтэй. Засгийн газар энэ долоо хоногт маргаантай Jackdaw ордыг зөвшөөрсөн нь ирэх сард ашиглалтад ороход нийлүүлэлтийг бага зэрэг нэмэгдүүлэх ч өвлийн таамагт бүрэн тусгагдаагүй аж.

Үндэсний эрчим хүчний системийн операторын (Neso) тусдаа тайланд дурдсанаар, Их Британи хүйтний улиралд цахилгааны цэвэр импортлогч байх бөгөөд Европын эрчим хүчний нийлүүлэлт өнгөрсөн өвлөөс хумигдмал байгаа тул үнэ өндөр байх магадлалтай. Зуны халалт Европын голуудын түвшинг бууруулж, Францын цөмийн цахилгаан станцуудын үйлдвэрлэл болон Норвегийн усан цахилгааны нөөцөд цохилт өгсөн бөгөөд Норвегийн нөөц долдугаар сарын сүүлээс хойш 10 жилийн доод түвшнээс доогуур байна.

Үндэсний статистикийн албаны энэ долоо хоногийн мэдээгээр Их Британи наймдугаар сард дууссан жилд цахилгаан импортод дээд амжилт болох 4 тэрбум фунт стерлинг зарцуулсны тал хувь нь Францаас авсан цахилгаанд ногджээ. Мөн сүлжээний түгжрэлийн улмаас салхи, нарны станцуудыг унтраахад мөнгө төлж, хийн станцуудыг ажиллуулахад бараг дээд амжилтын хэмжээний төлбөр гаргасаар ирсэн байна.

Сэргээгдэх эрчим хүч нэмэгдсэний ачаар энэ өвөл хийн цахилгаан станцыг ерөнхийдөө бага ашиглах ч нийлүүлэлт хумигдах үед хийн хэрэгцээ өмнө тооцоолж байснаас 7 хувиар өндөр байж болзошгүй. National Gas харанхуй, салхигүй өвлийн өдрүүдэд хийн станцууд их ачаалалтай ажилладгийг ажигласны дараа хамгийн эрс тэс хувилбаруудын таамгаа өсгөжээ. Компанийн захирал Гленн Брин-Якобсен “Эрэлт, нийлүүлэлтийн эдгээр хандлага нийлээд өндөр эрэлт, системийн ачаалалтай үед нийлүүлэлтийн нөөцийг улам хумисан” гэж хэлэв.