Хойд Солонгос НҮБ-ын Аюулгүйн зөвлөлд захидал илгээж, хилийн мина дэлбэрэлтийг Өмнөд Солонгосын зохиомол хэрэг гэв

Хойд Солонгос НҮБ-ын Аюулгүйн зөвлөлийн даргад захидал илгээж, өнгөрсөн сард хилийн ойролцоо гарсан мина дэлбэрэлтийг Өмнөд Солонгос зохиомлоор үйлдсэн хэрэг гэж мэдэгдсэн тухай тус улсын төрийн хэвлэл Даваа гарагт мэдээлсэн гэж The Korea Times бичив. Захидлыг Пхеньяны НҮБ-д суугаа байнгын төлөөлөгч Ням гарагт илгээсэн гэж Солонгосын Төв Мэдээллийн Агентлаг мэдээлжээ.

Захидалд Сөүл Цэрэггүй бүсэд гарсан дэлбэрэлтийг Хойд Солонгосын хилийн бэхлэлтийн ажилд саад учруулах гэсэн хорон санаатай оролдлогоор зохион байгуулсан гэж буруутгажээ. Пхеньян бэхлэлтийн ажлаа НҮБ-ын дүрэм болон олон улсын эрх зүйд бүрэн нийцсэн, гаднын түрэмгийллийн аюулаас нутаг дэвсгэрээ хамгаалах бүрэн эрхийн хууль ёсны хэрэгжилт гэж тодорхойлсон байна.

Хойд Солонгос мөн Өмнөд Солонгосын арми төслийн ажил дээр байсан цэргүүд рүү нь сануулгын буудлага хийсэн гэж буруутгаад, үүнийг аливаа улсын нутаг дэвсгэрийн бүрэн бүтэн байдлын эсрэг хүч хэрэглэхийг хориглосон НҮБ-ын дүрмийн 2 дугаар зүйлийн 4 дэх хэсгийг бүдүүлгээр зөрчсөн үйлдэл гэжээ. Пхеньян “Хэрэв Сөүл манай орны нутаг дэвсгэр рүү ганц миллиметр ч халдах юм бол” НҮБ-ын дүрмийн 51 дүгээр зүйлд заасан өөрийгөө хамгаалах эрхээ хэрэгжүүлнэ гэж анхааруулав.

Энэ алхам Өмнөд Солонгос 9-р сарын 21-нд гурван цэргийг шархдуулсан мина дэлбэрэлтийн төлөө Хойд Солонгосыг уучлалт гуйж, Зэвсэгт мөргөлдөөнийг зогсоох хэлэлцээрийг зөрчсөн хариуцлагаа хүлээхийг шаардсан захидлаа зөвлөлд илгээснээс хойш долоо хоног хүрэхгүй хугацааны дараа хийгдсэн юм.

НҮБ-д суугаа Өмнөд Солонгосын элчин сайд Ча Жи Хүн Пүрэв гарагт зөвлөлийн ээлжит даргыг хашиж буй Грекийн элчин сайдад хандан хоёр орчим хуудас захидал илгээж, дэлбэрэлтийн шалтгааныг тогтоосон мөрдөн шалгалтын дүгнэлтийг танилцуулжээ. Захидалд дэлбэрэлт 1950-53 оны Солонгосын дайныг зогсоосон хэлэлцээрийг зөрчин Хойд Солонгосын цэргүүдийн суулгасан минанаас болсон гэж онцолсон гэдэг.

Сөүл мөн Пхеньяныг хариуцлагатай арга хэмжээ авч, нөхцөл байдал цаашид хурцдахаас сэргийлж, итгэлцлийг сэргээхийн тулд яриа хэлэлцээ хийхийг уриалжээ. Хоёр Солонгосын хооронд солилцсон эдгээр захидал Хойд Солонгос Өмнөд Солонгос руу чанга яригчийн нэвтрүүлгээ сэргээнэ гэж сүрдүүлж, хилийн дагуух хурцадмал байдал нэмэгдэж буй үед гарч байна.