Пентагон томоохон дайны үед АНУ-ын цэргийн баазуудыг гаднын дэмжлэггүйгээр 90 хоног ажиллахад бэлтгэж байна
Цахилгаан тасрах, хангамж тасалдах зэрэг эрсдэлээс хамгаалах төлөвлөгөөнд зөөврийн цөмийн реактор, том хэмжээний батарей, бичил сүлжээ ашиглах тусгажээ.
Пентагон томоохон дайн гарсан тохиолдолд АНУ-ын цэргийн баазуудыг гаднын тусламжгүйгээр дор хаяж 90 хоног ажиллахад бэлтгэж байгааг Фокс Ньюс мэдээлснийг Hindustan Times бичив. Цайз нэртэй өргөн хүрээний санаачилгын хүрээнд хэрэгжих төлөвлөгөө цахилгаан тасрах, хангамж хомсдох, гол дэд бүтэц тасалдах үед ч Америкийн хүчин тулалдсаар байх боломжийг хангах зорилготой.
Пентагоны ахлах хэвлэлийн төлөөлөгч Шон Парнелл үндэсний батлан хамгаалахаа иргэний хотын дэд бүтцэд найдаж явуулах нь тэвчишгүй эрсдэл гэж хэлэв. Төлөвлөгөөгөөр АНУ-ын эх газрын томоохон цэргийн бааз бүр цахилгаан, ус, түлш, холбоо зэрэг гол үйл ажиллагаагаа дор хаяж 90 хоног бие даан явуулах ёстой. Парнелл хоёр далай биднийг хамгаална гэсэн хуучирсан төсөөлөл өнгөрсөн бөгөөд Ерөнхийлөгч Трамп Алтан бөмбөгөр, Баруун хагас бөмбөрцөг, Гренланд, Панамд анхаарал хандуулах зэргээр шинэ сэтгэлгээнд зам тавьсан гэжээ.
Цэрэг холбоо, ложистикаас эхлээд зэвсэг үйлдвэрлэл хүртэл бүх зүйлийг тэжээдэг иргэний цахилгаан сүлжээнээс хамааралтай байгаа нь гол санаа зовоосон асуудал юм. Төлөвлөгөөнд баазуудыг иргэний сүлжээнээс тусгаарлаж, удаан хугацаагаар цахилгаан тасарсан үед ч ажиллуулах боломжтой зөөврийн цөмийн реактор, том хэмжээний батарей хуримтлуур, бичил сүлжээг судалж байна.
Төлөвлөгөө мөн томоохон дайн цэргийг зэвсэг, тоног төхөөрөмж, чухал материалаар хангадаг дэлхийн нийлүүлэлтийн сүлжээг тасалдуулж болзошгүйг анхааруулж, сум, түлш, чухал ашигт малтмал, электроник, сэлбэг хэрэгсэл, эмнэлгийн хэрэгслийн нөөц бүрдүүлэхийг шаардаж байна. Мөн хамгийн чухал хэрэгцээ тус бүрд дор хаяж хоёр батлагдсан нийлүүлэгч эсвэл үйлдвэрлэлийн хувилбартай байх ёстой.
Төлөвлөгөөний өөр нэг чухал хэсэг нь хямралын үед батлан хамгаалахын үйлдвэрлэлд шилжиж болох арилжааны үйлдвэрүүдийг тодорхойлж, техникийн шаардлага, кибер аюулгүй байдал, гэрээний нөхцөлийг урьдчилан тогтоох явдал юм. Мөн цэргийн холбоо, навигаци, хиймэл дагуулын системийг саад учруулахаас хамгаалах, байршил тогтоох дохиог гацаах нөхцөл байдалд бэлтгэхийг тусгажээ. Парнелл энэ төлөвлөгөөг АНУ-ын даатгалын бодлого гэж тодорхойлсон байна.
