Узбекистан 2027 оноос элсэн чихрийн импортод квот тогтооно

Узбекистаны засгийн газар 2027 оноос элсэн чихрийн импортод жилд 300 мянган тонн квот тогтоохоор төлөвлөж байгааг Спот.уз мэдээллийн портал эх сурвалжид тулгуурлан мэдээлснийг Интерфакс бичив. Эх сурвалжуудын хэлснээр засгийн газар энэ шийдвэрийг 6-р сард гаргасан ч холбогдох тогтоолыг олон нийтэд нийтлээгүй байна.

Жилийн 300 мянган тонн квотыг ундаа, чихэр жигнэмэг болон бусад хүнсний бүтээгдэхүүн үйлдвэрлэгчдэд тус бүр 100 мянган тонноор хуваарилна. Дараагийн жилийн квотын хэмжээг Сайд нарын кабинет 11-р сард Эдийн засаг, сангийн яам, Өрсөлдөөнийг хөгжүүлэх, хэрэглэгчийн эрхийг хамгаалах хороо, Үндэсний статистикийн хорооны саналд үндэслэн батална.

Квотын хэмжээг дотоодын хэрэглээ, үйлдвэрлэлийн хүчин чадлын ачаалал, импортын болон дотоодын үнийг харгалзан зургаан сар тутам хянаж болох бөгөөд квотыг цахим онлайн дуудлага худалдаагаар хуваарилна. Системийг 2026 оны 12-р сарын 1-нээс өмнө ажиллуулж, Узбекистаны Гаалийн хорооны нэг цонхны мэдээллийн системтэй холбох ёстой бөгөөд дуудлага худалдааны үр дүнг ил нийтэлнэ.

Эдийн засаг, сангийн яаманд нэг сарын дотор Татварын хуульд нэмэлт өөрчлөлтийн төсөл боловсруулахыг даалгажээ. Дотоодын элсэн чихэр үйлдвэрлэгчдийг 2031 оны 1-р сарын 1 хүртэл ашгийн татвараас чөлөөлж, эд хөрөнгийн татварын хувь хэмжээг 50 хувиар тогтоохыг санал болгож байгаа бөгөөд хөнгөлөлтөөр хэмнэсэн хөрөнгийг аж ахуйн нэгжүүд зөвхөн зээлээ төлөхөд зарцуулах ёстой.