Японд том хөлөг онгоцны устөрөгчийн хөдөлгүүр бүтээж, нүүрсхүчлийн хийн ялгарлыг 95 хувиар бууруулжээ

Японы далайн хөдөлгүүр үйлдвэрлэгч компани том оврын худалдааны хөлөг онгоцонд зориулсан дэлхийн анхны устөрөгчийн түлшээр ажилладаг хөдөлгүүрийг бүтээсэн гэж мэдэгдсэнийг Kyodo News мэдээлэв. Хөдөлгүүр нь уламжлалт хүнд түлшээр ажилладаг хөдөлгүүртэй харьцуулахад нүүрсхүчлийн хийн ялгарлыг 95 гаруй хувиар бууруулах чадвартай аж.

Japan Engine компанийн хөдөлгүүрийг 9-р сарын эхээр танилцуулсан бөгөөд Onomichi Dockyard компанийн барих олон зориулалттай хөлөг онгоцонд суурилуулж, Mitsui O.S.K. Lines компани 2028 оны 4-р сараас хөлөг дээр туршилт эхлүүлэх төлөвтэй. Хөдөлгүүр нь устөрөгчийг тогтвортой шатаахын тулд өндөр даралтын шууд шахалтын системтэй бөгөөд устөрөгч амархан алдагддаг, маш шатамхай тул түлш дамжуулах хоолойг давхар ханатай хийх зэрэг аюулгүй байдлын арга хэмжээ авсан байна.

Хёго мужийн Акаши хотод төвтэй Japan Engine өнгөрсөн оны 8-р сард мөн аммиакаар ажилладаг дэлхийн анхны бүрэн хэмжээний худалдааны хөдөлгүүрийг бүтээсэн гэж мэдэгдэж байжээ. Устөрөгч, аммиак хоёулаа том худалдааны хөлөг онгоцны ирээдүйн түлш болно гэсэн хүлээлт өндөр ч устөрөгч өндөр өртөг, удаан нэвтрэлтийн бэрхшээлтэй, аммиак хортой тул аюулгүй байдлын хатуу арга хэмжээ шаарддаг.

Олон улсын далайн байгууллага 2050 он гэхэд хүлэмжийн хийн цэвэр ялгарлыг тэглэх зорилт тавьсан бөгөөд Японы засгийн газар эдгээр хүчин чармайлтыг дэмжиж байна.