Ерөнхийлөгч Ли Өмнөд Солонгос түүний бүрэн эрхийн хугацаанд CPTPP-д элсэх магадлал бага гэв

Өмнөд Солонгосын Ерөнхийлөгч Ли Жэ Мён тус улс түүний бүрэн эрхийн хугацаанд Номхон далайг дамнасан түншлэлийн иж бүрэн, дэвшилтэт хэлэлцээрт элсэх магадлал бага гэдгийг Даваа гарагт хэлсэн ч улс төрийн шүүмжлэлийг үл харгалзан суурийг тавих шаардлагатай гэж онцолсныг The Korea Times мэдээлэв. Хэлэлцээрт элсэхэд гишүүн орон бүрийн зөвшөөрөл шаардлагатай тул хэлэлцээ удаан үргэлжилж болзошгүй гэжээ.

Япон, Их Британи, Канад, Австрали зэрэг томоохон эдийн засагтай 12 орныг багтаасан энэ хэлэлцээр дэлхийн ДНБ-ий 15 орчим хувийг эзэлдэг. Ерөнхийлөгч 2030 оны 6-р сард дуусах таван жилийн ганц бүрэн эрхийн хугацаандаа эцсийн тохиролцоонд хүрэхгүй байх магадлал илүү өндөр ч улсын хувьд шүүмжлэлийг үл харгалзан суурь ажлаа хийх ёстой гэв.

Засгийн газар 9-р сарын 28-нд нөлөөллийн үнэлгээгээ нийтэлсний дараа газар тариаланчид зах зээлийг улам нээхийг эсэргүүцсэн тул өргөдөл гаргахыг хойшлуулжээ. Үнэлгээгээр гэрээ хүчин төгөлдөр болсноос хойшхи эхний 15 жилд газар тариалангийн үйлдвэрлэл жилд дунджаар 710 тэрбум вон буюу 536.37 сая ам.доллараар, загас агнуур 81.7 тэрбум, ойн аж ахуй 60.6 тэрбум воноор буурах бол аж үйлдвэрийн үйлдвэрлэл жилд 6.3 их наяд воноос 6.7 их наяд вон хүртэл өсөх төлөвтэй.

Ли Жэ Мён “Бид зөвхөн хагас дамжуулагчаар амьдарч чадахгүй, зөвхөн газар тариалангаар ч амьдарч чадахгүй” гэж хэлээд, хүн цөөн, хүч чадалгүй учраас л нэг талын хохирол амсах ёсгүй гэв. Худалдаа, аж үйлдвэр, байгалийн нөөцийн яам гэрээнд элсэх нь экспортын зах зээлээ төрөлжүүлэхэд зайлшгүй гэж үзэж байгаа бөгөөд сайд Ким Жон Гван Пүрэв гарагт болсон парламентын шалгалтын үеэр элсэлтийг хангана гэж мэдэгдсэн юм.