Росатом Хойд тэнгисийн замыг 2027 оны эхээр жилийн турш ажиллуулна гэж найдаж байна

Интерфакс агентлагийн мэдээлснээр, Оросын Росатом төрийн корпораци Хойд тэнгисийн замыг 2027 оны эхээр жилийн турш ажилладаг горимд шилжүүлнэ гэж найдаж байна. Энэ үед хамгийн том ачаа илгээгчдийн нэг нь бүтээгдэхүүнээ Ази руу тогтмол тээвэрлэж эхлэх юм. Энэ тухай Росатомын Хойд тэнгисийн зам, Арктикийг хөгжүүлэх асуудал хариуцсан захирал, Арктикийн газрын дарга Владимир Панов агентлагт өгсөн ярилцлагадаа хэлжээ.

Пановын хэлснээр, сүүлийн жилүүдэд энэ зорилгод хүрэх тал дээр мэдэгдэхүйц ахиц гарч, зүүн чиглэлд тогтмол аялал хийх бэлтгэл эцсийн шатандаа явж байна. Звезда усан онгоцны үйлдвэр Арктикийн зэрэглэлийн хөлөг онгоц барьж, анхны хоёр хийн тээврийн хөлгийг захиалагчид нь хүлээлгэн өгчээ. Новатэк компани уг замаар шингэрүүлсэн байгалийн хийг их хэмжээгээр тээвэрлэж байгаа бол Роснефть компанийн хамгийн том Восток Ойл төсөл ачилт хийж эхэлсэн бөгөөд одоогоор 6 удаа ачаа тээвэрлэжээ.

Ирэх оны эхээр Чукотка хэмээх цөмийн мөс зүсэгч хөлгийг ашиглалтад оруулснаар цөмийн мөс зүсэгч флот 9 хөлөгтэй болно. «Хойд тэнгисийн зам зүүн чиглэлд тогтмол тээвэр хийх, өөрөөр хэлбэл жилийн турш ажиллахаас нэг алхмын зайд байна» гэж Панов онцолжээ.

Цаашид технологио сайжруулах шаардлагатай гэж тэрээр нэмж хэлэв. Жишээлбэл, өвөл, хаврын улиралд хөлөг онгоцны цуваа дагуулах нь асуудал биш ч ачаа тээврийн үр ашгийг нэмэгдүүлэхийн тулд цувааны хурдыг ахиулах шаардлагатай бөгөөд энэ нь одоогийн гол зорилтуудын нэг аж. Мөн аврах дэд бүтэц, холбоо, эмнэлгийн үйлчилгээ зэргийг өргөжүүлэх хэрэгтэй гэжээ.

Энэ чиглэлд их ажил хийгдсэн байна. Онцгой байдлын яам Певек, Сабетта хотод Арктикийн цогц аврах төв байгуулж, Диксон, Тикси хотод ийм төв барьж байна. Тээврийн яам уг замын усан хилд бэлэн байдлыг хангах 14 аврах хөлөг онгоцтой флот бүрдүүлсэн бөгөөд дахиад 10 хөлөг баригдаж байна. Ийм дэд бүтцийг цаашид ч өргөжүүлэх шаардлагатай гэж Панов үзэж байна.

Пановын хэлснээр, геополитик, эдийн засгийн үүднээс Хойд тэнгисийн замын хөгжил чухал эргэлтийн цэгт хүрч, шинэ шатанд шилжиж байна. Одоо зөвхөн Хойд тэнгисийн замын тухай биш, түүнтэй холбогдсон дотоод усан зам, төмөр зам болон бусад тээврийн дэд бүтцийг багтаасан Арктикийг дамнасан тээврийн коридор байгуулах тухай яригдаж байгаа юм. Уг коридор Арктикийн бүс, Алс Дорнодыг цогцоор нь хөгжүүлэх, Оросын эрэг дагуух дотоод, олон улсын болон транзит тээврийг хөгжүүлэхэд чиглэж байна.