Трампын засаг захиргаа ОХУ-ын Шууд хөрөнгө оруулалтын сангаас хориг арга хэмжээг цуцлах боломжийг авч үзэж байна

АНУ-ын Ерөнхийлөгч Дональд Трампын засаг захиргаа ОХУ-ын Шууд хөрөнгө оруулалтын сангаас хориг арга хэмжээг цуцлах боломжийг авч үзэж байна. Энэ тухай ОХУ, АНУ-ын хэлэлцээний явцыг мэддэг эх сурвалжуудаас иш татан Нью-Йорк Таймс сонин мэдээлснийг Медуза хэвлэл дамжуулав.

Эх сурвалжуудын хэлснээр, Москва сан нь Оросын дизель түлшийг АНУ-д нийлүүлэхэд оролцох боломжтой болохын тулд хоригийг цуцлахыг шаардаж байна. Тэдний нэгний хэлснээр, АНУ-ын Сангийн яам сангийн хориг цуцлах хүсэлтийг ердийн журмын дагуу хянаж байгаа бөгөөд энэ нь хориг тавих болсон үндэслэл хүчингүй болсныг сан нотлох шаардлагатай гэсэн үг юм.

Санг Орос-Америкийн хэлэлцээний гол оролцогчдын нэг Кирилл Дмитриев тэргүүлдэг бөгөөд тэрбээр ОХУ, АНУ-ын хамтарсан боломжит бизнесийн төслүүдийн талаарх Кремлийн саналыг сурталчилж байна. Сан 2011 онд Орост гадаадын хөрөнгө оруулалт татах зорилгоор байгуулагдсан бөгөөд түүний хөгжүүлсэн хамгийн алдартай төсөл нь коронавирусын эсрэг Оросын Спутник V вакцин юм. Дмитриев болон түүний эхнэр Наталья Попова Оросын Ерөнхийлөгчийн бага охин Катерина Тихоноватай ойр дотно гэж үздэг.

АНУ-ын Ерөнхийлөгч Жо Байдены засаг захиргаа ОХУ Украин руу бүрэн хэмжээний түрэмгийлэл эхлүүлснээс дөрөв хоногийн дараа буюу 2022 оны 2 дугаар сарын 28-нд тус санд хориг арга хэмжээ авсан юм. «Албан ёсоор ОХУ-ын Шууд хөрөнгө оруулалтын сан нь тусгаар улсын хөрөнгө оруулалтын сан боловч олон хүн түүнийг Ерөнхийлөгч Владимир Путины хар касс, Оросын эрх мэдлийн тогтолцоонд хамаарах клептократийн тод жишээний нэг гэж үздэг» гэж АНУ-ын Сангийн яам тухайн үед мэдэгдэж байв.